يعنى ايه احتياج؟

شارك الموضوع

الدرس التانى : معنى الاحتياجات

وهنبدأ مع بعض الدرس بسؤال

يعنى ايه احتياج؟

ايه الفرق بين انى اكون عاوز حاجة وبين انى اكون محتاج حاجة؟؟

زى ما لينا احتياجات جسدية زى المية والهوا والاكل والنوم كمان 

عندنا احتياجات نفسية زى مثلا الحب والقبول من الناس والشعور 

بالامان وعندنا احتياج روحى اساسى وهو الاحتياج لله .

الاحتياج لللاكل لازم نشبعه بشكل صحى وسليم علشان جسمنا 

يبقى سليم كمان الاحتياجات النفسية الروحية لازم نشبعها 

علشان " شخصياتنا " تبقى سليمة .

يعنى ايه شخصياتنا؟؟

الشخصية :

هى الحاجات اللى بتميز كل انسان عن التانى . كلنا بنفكر لكن 

مش كل الناس بتفكر بطريقة واحدة , ممكن حاجة واحدة تحصل 

قدام اتنين, واحد يفهمها بطريقة وواحد تانى يفهمها بطريقة تانية 

علشان كل واحد بيفكر بطريقة مختلفة عن التانى وبيستقبل اللى 

بيحصل حواليه فى الدنيا بطريقة مختلفة عن غيره , كلنا تقريبا 

بنشعر بنفس المشاعر : الخوف والغضب والحزن والفرح ولكن 

بدرجات من واحد للتانى وفى مواقف مختلفة .



" يعنى الشخصية هى طريقة الواحد فى التفكير والشعور والسلوك "الشخصية فيها حتة بنتولد بيها منقدرش نغيرها وحته تانية اكبر 

بتتكون مع السنين من خلال اللى بنتعلمه وبنشوفه والعلاقات 

المهمة اللى فى حياتنا والحاجات اللى بتحصل حوالينا .

ايه هى الاحتياجات النفسية وازاى ناخدها؟


1- القبول من غير شروط

اننا نكون مقبولين بنى ادمين من غير ما نعمل حاجة حلوة زيادة او 

حتى لما نعمل حاجة غلط

2- الامان

اننا نحس ان الحياة والناس اللى حوالينا مش خطر قوى ومافيش 

حاجات بتهددنا , واحنا كمان نحس ان فيه حد ممكن يحمينا لما 

نتعرض لخطر

3- الاعجاب

اننا نعجب حد ويكون لينا تأثير كويس فى الناس والحياة حوالينا 

والناس تعبر لنا عن الاعجاب ده

4- الاحترام ان الناس تحترم حقوقنا واحتياجاتنا ومتتعداش عليها 

وكمان محدش يستغلنا علشان انبساطه

5- التشجيع

ان حد يقف جنبنا ويمدحنا لما نعمل حاجة كويسة


6- الاهتمام

انن نكون مهمين عند حد , حد يفكر فينا ويهتم بمصلحتنا ويبذل 

مجهود علشان نكون مبسوطين وبخير

7- المساندة

ان حد كبير بنحترمه يقف جنبنا ويسمعنا ويسندنا ولو طلبنا منه 

النصيحة ينصحنا

8- التعزية

ان حد يقف جنبنا لما نكون حزانى ويستحمل حزننا ومشاعرنا 

الملخبطة فى الوقت ده

9- دفء المشاعر

ان حد يحس بمشاعرنا ويعبر لنا عن حنانه بطرق سليمة ومحترمة


10- التقدير ان حد يقدر وييفهم اللى بنمر بيه ويبذل مجهود انه 

يعرف دنيتنا شكله ايه وازاى الاختلاف بينا

واضح ان الاحتياجات مش ممكن نجيبها من السوبرماركت , مش 

ممكن نشترى يلو حنان وعلبة تشجيع ودستة تقدير

الاحتياجات دى مش ممكن ناخدها الا من ناس

الناس اللى حوالينا بياثروا فينا خصوصا القريبين مننا , فلما مناخدش 

الاحتياجات دى خصوصا فى الطفولة شخصياتنا بتبقى فيها حاجة 

مش مظبوطة . بالنسبة للجسم, نقص الكالسيوم بيعمل تشوهات 

وكل ده بسبب مثلا اننا واحنا صغيرين مشربناش لبن

بنفس الطريقة لما نتحرم من الاحتياجات النفسية الضرورية تحصل 

تشوهات فى شخصياتنا يمكن تفضل طول العمر وتحتاج لوقت كبير 

فى التصليح والاحتياجات دى ممكن ناخدها من نفسنا ومن الناس

ليه الكلام غريب علينا؟؟

ماحدش ينكر الاحتياجات الجسدية علشان بنحس بيها فى جسمنا 

غصب عننا لكن الاحتياجات النفسية مش واضحة بنحس بيها ونقدر 

نغلوش عليها كمان التعبير عن الاحاسيس النفسية محتاج حد 

يعلمهولنا من واحنا صغيرين

واحنا صغيرين علمونا كلام يعبر عن احتياجات الاكل مثلا نقول " مم 

" لكن السؤال :" هل اهلنا علمونا كلام يعبر عن مشاعرنا واحياجاتنا 

النفسية زى " انا متضايقة " او " انا زهقان "

وقبلوا اننا نقول كده من غير ما يلومونا او يزعلوا مننا؟؟


ساعات بيعتبروه تذمر وتبطر على النعمة , يبقى عمرنا ما هانتعلم 

الكلام ده , فتكون النتيجة ياما نكتمها علشان نعرف نعيش ومع 

الوقت بننسى ان عندنا مشاعر واحتياجات اصلا

هات ورقة وقلم جه وقت التدريب

عندنا احتياجات كتير

قدام كل احتياج اكتب قد ايه حاسس انك شبعان منه او محتاج ليه؟

القبول

الاعجاب

المساندة والتعزية

دفء المشاعر

الامان

الاهتمام

التقدير والاحترام

ولو تحب تشاركنا بكومنت ياريت

انا عايز

ايوه عايز

ايوه , من حقى اعوز

ده ضرورى مش يجوز

واللى مستغنى يوسع

او ياخد باله ويسمع

اوعى يابنى تخاف تعوز

اوعى تتردد , تبوظ..

احنا بنعوز اللى نكبر بيه وناخد حقنا

احنا بنعوز اللى بيخلينا خلقة ربنا

احنا بنعوز وناّخد بعضنا

عوز وغامر

قول وخاطر

فى الحقوق مفيش خواطر

احتفظ يابنى بحقك

هوا حقك

من زمان

مش راح تتوه مادمت متمسك وناوى

مهما كان

او تتنازل لو الحق اتاخر شويه

انت يابنى تمام , مانتاش هفيّه

بس يالله !!!